السبت، 31 يوليو، 2010

نقطة ضعف_2

طارق: مفهوم
ابو مها: متزعلش منى يا طارق يابنى .. انا اب ولازم اخاف على بنتى
ولازم اتطمن على مستقبلها
وانت شكلك شاب كويس ومقدر الموقف
طارق: مفهوم

.
.

مها: ها يا طارق عملتو ايه
طارق: عملنا ايه !! ؟
مها: ايه فى ايه .. حصل ايه
طارق: يعنى انتى مكنتيش تعرفي هيحصل ايه
مها: لا .. قولى حصل ايه
طارق: يعنى قبل ماجى مكنتيش حاكيه لباباكى على التفاصيل .. ومعرفاه امكانياتى بالظبط
مها: لا كنت حاكياله .. دا اكيد يعنى
طارق: اه .. واكيد طبعا كنتى عارفه رايه فى الموضوع ده .. بس مينفعش تقوليلي كده فى وشي
لازم تيجي منه بشكل ظريف كده ومقنع .. ولازم يأمنى الامانة اننا نبقي اخوات واخاف عليكي
مها: ايه الكلام دا يا طارق .. انا اعمل كده بردو ؟
طارق: امال دا تسميه ايه
ابوكى جايبنى يحرجنى بالذوق .. ويفهمنى ان انا مينفعش انول شرف الارتباط ببنته
لان حياتى على كف عفريت .. ومعرض انى اترمى فى الشارع زى الكلاب فى اى وقت
مها: ايه يا طارق اللى انت بتقوله ده .. انت كل الفترة دى مكنتش تعرفنى كويس
انا بحبك يا طارق ونفسي ارتبط بيك النهارده قبل بكرة
طارق: ابوكى عايزنى ابعد عنك يا مها .. ايه رايك
مها: انت رايك ايه ؟؟ .. خلاص استسلمت كده .. كل اللى بينا اتنسي من اول وقعة؟
خلاص كل حاجة اتفقنا عليها ضاعت ؟؟
طارق: عاوزانى اعمل ايه يا مها .. ابوكى كده بيعجزنى
هو مش عارف يعنى ايه اجيب شقة فى وقت زى ده .. ويعنى ايه اشتغل زى ما هو عايز كده .. هو فى حد لاقي شغل اصلا
مها: طارق .. انا مش عاوزه حد غيرك .. انا اد كل كلامى ليك .. انت اد كلامك ولا لا ؟؟
طارق: انا لو مش اد كلامى مكنتش جيت لحد عندكو
مها: خلاص نستحمل شوية يا طارق .. ربنا هيكرمك ان شاء الله والحال هيتغير

.
.

مها: ليه يا بابا كده .. انت عارف ومتاكد ان طارق راجل وهيقدر يشيل مسئوليتي
ابو مها: اسكتى انتى .. انتى مش عارفه مصلحتك
مسئولية ايه بس .. عايز يعيشك فى شقة ايجار .. .يعنى سنة ولا اتنين وتلاقي نفسك فى الشارع
وتفضلو بقي تتلطعو من هنا لهنا
وبعدين دا شغال بعقد .. دا شغل دا .. يعنى لما الشركة دى تفلس ولا صاحب الشركة دى يروح فى داهية هيعمل ايه بقي سعادته
مها: يا بابا دى كلها ارزاق .. ربنا هو اللى بيوزع الارزاق .. احنا مش هنحسبها بالورقة والقلم كده
ابو مها: ونعم بالله يا بنتى .. بس ليه نرضي باللى وضعه مهزوز ده .. واحنا ادامنا الكويسين كتير
مها: كويسين ازاى .. ادامنا فين ؟؟
ابو مها: قصدي بكره يجيلك احسن منه كتير
مها: بس انا مش عايزه احسن منه يا بابا
ابو مها: خلاص الموضوع دا اتقفل .. يالا اتفضلى

.
.
بعدها بكام يوم

ام مها: مالك يا بنتى .. قاعدة لوحدك ليه
مها: مفيش يا ماما .. تعالى اقعدى معايا
ام مها: انتى مبتخرجيش ليه مع صاحبتك .. بقالها كتير ماتصلتش بيكي
مها: هكلمها ونخرج بالليل
ام مها: لا .. النهارده لا
مها: ليه
ام مها: النهارده خالتك جايالنا .. ومشافتكيش من زمان
مها: طب وايه يعنى .. هبقي اعدى عليها اقعد معاها شوية فى اى وقت
ام مها: لا عيب الناس جايينلنا فى بيتنا وانتى تنزلى وتسيبيهم
مها: ناس مين يا ماما دى خالتى
ام مها: خلاص بقي يا مها عيب .. خالتك عايزة تشوفك مش لازم تخرجى النهارده
مها: ماشي يا ماما

.
.
نفس اليوم بالليل

مها: بتعملى ايه عندك يا ماما .. بتدورى على ايه فى الدولاب
ام مها: ايوة هو الطقم دا .. بتبقي زى القمر فيه
مها: طقم ايه .. مطلعاه ليه دا دلوقتى
ام مها: عشان تلبسيه
مها: والبسه ليه هو انا هخرج؟
ام مها: يعنى هو لازم تخرجى عشان تلبسي هدومك
مها: يعنى دى مش هدومى بردو
ام مها: لا بس البسي دا وريحي امك
مها: ماما .. فى ايه يا ماما
ام مها: مفيش حاجة يا بت .. عاوزاهم يشوفوكى بالطقم دا
انتى كده بتجيبي الحاجة وتركنيها .. لحد ما تضيق عليكي وترميها فى الاخر
مها: يعنى هى حبكت النهارده
ام مها: معلش البسي بس

.
.

مها: مش عارفه مش متطمنه يا طارق
طارق: ليه حصل ايه
مها: خالتى كانت عندنا امبارح .. هو وجوزها وعيالها
ومن زمان مجوش كلهم كده
وبعدين امى صممت انى البس طقم جديد كده كنت جايباه
واطلع اقابلهم بيه
طارق: يعنى ايه
مها: مش عارفه .. بس حاسه ان فى حاجة بتحصل من ورايا

.
.
بعدها بكام بوم

مها: اسكت يا طارق .. مش انا مقري فاتحتى
طارق: فاتحة ايه
مها: فاتحتى انا .. هههههههههه
عارف انت النظام ده .. يتولد ولد وبنت فى نفس العيلة قريبين من بعض
يقولك خلاص فلان دا لفلانة
طارق: اه وانتى الفلانة بقي
مها: ايه مالك .. دا كلام فارغ
طارق: كلام فارغ
مها: اه
ميقرو براحتهم .. شوفتنى روحت اتجوزته
لا مشوفتكيش .. بس الله اعلم
مها: يا سلام
طارق: وانتى ايه اللى فكرك بالسيرة دى دلوقتى
مها: اصل فاكر لما قولتلك انا مش متطمنة من كام يوم كده
طارق: اه .. يوم خالتك
مها: اه .. اتاريهم يا سيدي كانو قرو فاتحة من ورايا
بيقرو فاتحتى فى غيابي يا سيدي
طارق: وبعدين
مها: وجايين بقي يشوفونى بقيت عاملة ازاى دلوقتى
كبرت كده وبقيت عروسة ولا لسه
طارق: وبعدين
مها: وجايبين هانى ابن خالتى بقي .. وجايين يخلوها خطوة رسمية
طارق: وهانى ابن خالتك دا معاه ايه
مها: معاه دبلوم
طارق: اه .. وبيشتغل ايه
مها: بيشتغل كهربائى .. بس هو وارث من ابوه يعنى .. وعندهم محلات هو اللى ماسكها
طارق: اه وعنده شقته ملكه هو .. مش هيأجر
مها: اه ... انت بتبصلى كده ليه
زى ميكون انا موافقة
طارق: وانتى رايك ايه
مها: انت اللى رايك ايه فى الموضوع ده
طارق: رايي انا هيعملك ايه
هو انا اللى هتجوز
مها: لا رايك يهمنى طبعا
طارق: رايي مانتى عارفاه من زمان .. ومتفقين على الموضوع دا كله
مها: طيب اتطمن .. محصلش حاجة اصلا .. الموضوع منتهى
طارق: منتهى ايه بس .. هو لسه حصل حاجة
مها: طالما انا مش موافقة يبقي منتهى
طارق: منتهى ازاى
دا وارث .. وعنده محلات .. يعنى شغل ثابت
وعنده شقته .. يعنى مش هيترمى فى الشارع فى اى وقت
دا غير انكو عارفينه .. يعنى مش محتاجين تسالو عنه
مها: ايه يا طارق انت مش واثق فيا
طارق: معلش انا همشي دلوقتى .. انا مش شايف ادامى
مها: استنى يا طارق .. طارق

..يتبع

الأربعاء، 7 يوليو، 2010

نقطة ضعف_1

67.3%

مها: يعنى رسيت على جيد
طارق: الحمد لله .. كده فلة .. احنا هننهب؟؟
مها: الحمد لله على كل حال .. المهم بس تشوف ايه بعد كده
طارق: نشوف طبعا .. احنا ورانا حاجة الا مصلحتنا
مها: يا سلام عليك وانت عارف مصلحتك كده .. بحس انك زى ميكون عاقل
طارق: على اساس انى مجنون يعنى
مها: يعنى .. مش اوى
طارق: طبعا مجنون .. هو انا لو مش مجنون كنت حبيتك
مها: واللــــــــه .. ماشي ماشي
طارق: ههههههه .. الله .. شوف هتزعل اهى
مها: لا مش زعلانة
طارق: وحتى لو زعلانة يعنى :P

.
.

بعدها بشهرين بالظبط

طارق: ايوة يا مها .. عاملة ايه
مها: الحمد لله .. عملت ايه
طارق: روحت الشركة دى وعملت انترفيو مع الناس هناك
سيبتلهم السي في بتاعى .. ومستنى الرد .. ربنا يسهل
مها: يا رب

.
.

بعدها بكام يوم

مها: ها .. ايه الاخبار
طارق: للاسف .. قبلونى :P
مها: يا سخيف
طارق: هههههههههه .. انا سخيف؟
مها: اه بقي .. ومش هرجع فى كلامى
طارق: ماااشي .. وانا ماشي .. ماشي؟
مها: استنى بس .. مش سخيف اوى يعنى
طارق: هههههههههه .. المهم
شدي حيلك انتى بقي فى السنتين دول .. اكون انا اشتغلت حبة .. وظبطت نفسي
وساعتها نبقي ناخد معاد من السيد الوالد
مها: :)

.
.

عدو السنتين
طارق شغال فى شركة قطاع خاص
مها خلصت الكلية
طارق ميسور الحال .. زيه زى معظم شباب مصر
طارق قرر يقابل ابو مها

.
.

طارق: ها يا ستي .. مش نيجي بقي نشرب فنجان قهوة مع الوالد
ولا انتو معندكوش بن
مها: البن عندنا كتير .. بس انت تنور
طارق: واقعة واقعة يعنى
مها: مش بقولك انت رخم .. يالا ياض من هنا .. معندناش بنات للجواز
طارق: يا شيخة روحى كده .. دانا هنشلك من العنوسة يا بايرة
مها: انا بايرة .. ماشي يا طارق
طارق: ااايوة .. هى عادتك ولا هتشتريها
يالا قومى اروحك واروح اشوف مصلحتى
وابقي اتقمصي فى بيتكو براحتك
قهوتى مظبوط على فكرة .. شوفى ابوكى قهوته ايه .. قصدى فاضي امتى
مها: هههههههههههههههه .. :)

.
.

ابو مها: اهلا يا باشمهندس .. تعالى
طارق: سلام عليكم
ابو مها: وعليكم السلام ... اتفضل
على حد علمى انك خريج هندسة .. زى مها .. مش كده
طارق: فعلا .. دى حقيقة
بس انا الكترونيات
ابو مها: اه .. مجال كويس
انا مش هسالك انت عرفتها ازاى والكلام ده
لانه بقي سؤال سازج طبعا
المهم انكو عارفين بعض كويس دلوقتى
بس اللى المفروض اتطمن عليه هو مستقبل بنتى
ولا انت رأيك ايه ؟؟
طارق: حضرتك عندك حق
ابو مها: طب وعشان اتطمن عليها .. المفروض تكون انت امكانياتك ايه
طارق: مش عارف بصراحة ايه المواصفات اللى حضرتك طالبها
بس اللى بامكانى انى هأجر شقة فى الحتة اللى تعجب حضرتك
ومرتبي فى الشركة كويس جدا .. ومستعد لاى شبكة هى تطلبها
ابو مها: تفتكر دا كفاية؟
طارق: طب حضرتك طلباتك ايه
ابو مها: اللى اقتنع بيه ويخش دماغى .. ان المفروض يكون عندك شقة يا باشمهندس
انت عارف ان ممكن فى اى لحظة صاحب الشقة اللى هتأجرها يقولك مع السلامة
ويا عالم ساعتها هيكون ايه الوضع
غير انك شغال فى شركة بعقد .. يعنى بردو معرض انك تبقي من غير شغل فى اى وقت
بمجرد ان يحصل اى مشكلة بينك وبين صاحب الشركة اللى بتشتغل فيها
يعنى ببساطة انت وضعك مش مستقر خالص
طارق: بس حضرتك عارف انى لسه شاب فى بداية الطريق .. وصعب اوى انى ارضي احتياجات حضرتك فى الوقت ده
انا عن نفسي مستعد اعمل كل اللى حضرتك تطلبه واكتر .. بس حاليا ما باليد حيلة
محتاج شوية وقت على الاقل
ابو مها: طيب والوقت معاك .. ربنا يوفقك
طارق: طيب وانا موقفى ايه حاليا من بنتك
ابو مها: اظن انت انسان كويس .. وباين ان عقلك كبير
ببساطة انا مقدرش اسيب بنتى حايتها على كف عفريت
انت كشخصية انا مش معترض عليك .. بس انا بردو كـ أب عاوز اتطمن على بنتى
طارق: مفهوم

يتبع..

الأحد، 27 يونيو، 2010